Jean McNiff í heimsókn

Í lok janúar heimsótti Jean McNiff Háskólann á Akureyri. Hún átti m.a. samtal við starfsfólk miðstöðvar skólaþróunar og heilbrigðisvísindasviðs, tók þátt í og stjórnaði dagskrá þriðja rannsóknarþings kennaradeildar og átti fund með forystufólki í leik-, grunn- og framhaldsskólum Akureyrar.

Jean McNiff er prófessor í menntarannsóknum við York St John University í Bretlandi. Hún er heimsþekkt og leiðandi fræðikona á sviði starfendarannsókna og fer víða um heim og leggur skólafólki lið í starfendarannsóknum. Hún leggur áherslu á að skólafólk rannsaki sjálft sína eigin starfshætti og leggi þannig sitt af mörkum til þekkingarsköpunar í þágu skólastarfs. Hún leggur jafnfram áherslu á ígrundun eða sjálfsrýni (self-reflection), að skólafólk hugi að eigin gildum og hvort það starfi í samræmi við þau.

Jean hefur skrifað greinar og gefið út fjölda bóka um starfendarannsóknir og var hún útnefnd höfundur febrúarmánaðar af bókaútgáfunni Routledge sem nýlega gaf út bókina Action Research: principles and practice eftir Jean McNiff. Hægt er að fá frekari upplýsingar um útnefninguna og Jean sjálfa á vef Routledge.
 
Vilji fólk kynna sér viðhorf og störf Jean McNiff þá heldur hún úti vefsíðu: http://www.jeanmcniff.com/.