Krakkaspjall

Á námskeiðinu Krakkaspjall kynnast þátttakendur samræðu- og samskiptaverkefni fyrir nemendur á yngsta stigi og miðstigi grunnskóla og læra að nýta það í eigin starfi. Verkefnið samanstendur af tíu samræðufundum og miðar að því að efla samræðu- og samskiptafærni nemenda og byggja upp hæfni sem nýtist þeim í daglegum samskiptum.

Þátttakendur fá þekkingu á fræðilegum grunni verkefnisins og verkfæri til að leiða samræðufundi með nemendahópum.

Markhópur

Grunnskólakennarar á yngsta stigi og miðstigi, auk náms- og starfsráðgjafa.

Markmið námskeiðsins

Að námskeiði loknu eiga þátttakendur að:

þekkja fræðilegan grunn verkefnisins,
geta leitt nemendahóp í gegnum verkefnið,
geta nýtt verkfæri verkefnisins í samræðu- og samskiptavinnu með nemendum.

Um verkefnið

Meginmarkmið Krakkaspjalls er að nemendur fái tækifæri til að þjálfa samræðu- og samskiptafærni sem nýtist þeim í daglegum samskiptum.

Í verkefninu fá nemendur tækifæri til að:

efla færni sína í tjáningu og miðlun,
beita skapandi og gagnrýninni hugsun,
efla sjálfstæði sitt og samvinnu,
nýta miðla og upplýsingar,
efla sjálfsmynd sína.

Krakkaspjall styður við lykilhæfni Aðalnámskrár grunnskóla.

Uppbygging samræðufundanna

Krakkaspjall samanstendur af tíu samræðufundum sem hver tekur 40–60 mínútur. Einn fundur er helgaður hópeflisleikjum. Hinir níu fundir byggjast á:

viðfangsefni eða lykilspurningu,
samræðu um viðfangsefnið,
leik eða verkefnavinnu,
samantekt.

Nemendur setja sér markmið á fundunum, vinna að þeim milli funda og taka jafnframt þátt í að setja samræðuviðmið sem eiga að styðja gæði samskipta og samræðna í hópnum.

Tenging við heimili

Foreldrar fá tækifæri til að fylgjast með þeim viðfangsefnum sem tekin eru fyrir í Krakkaspjalli og ræða þau heima með barninu.

Uppbygging og framkvæmd

Námskeiðið er í boði á staðnum og á vef. Í báðum námskeiðsformum kynna þátttakendur sér efnið, prófa verkfæri verkefnisins með nemendahópi í eigin starfi og fá ráðgjöf í ferlinu.

Námskeið á staðnum

Fyrri hluti námskeiðsins

Þátttakendur og námskeiðshaldari hittast á staðnum. Farið er yfir hugmyndafræði og fræðilegan grunn verkefnisins og þátttakendur fá kynningu á efni og verkfærum verkefnisins.

Fyrri námskeiðsdagurinn er kl. 10.00–16.00.

Milli námskeiðshluta

Að loknum fyrri hluta vinna þátttakendur með tíu samræðufundi verkefnisins, hver í sínum skóla og með eigin nemendahópi.

Þátttakendur hafa aðgang að Padlet-svæði námskeiðsins þar sem hægt er að deila hugmyndum og reynslu af vinnunni.

Einstaklingsráðgjöf

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Í seinni hlutanum er unnið úr reynslu þátttakenda og námskeiðinu lokið.

Seinni hluti námskeiðsins fer fram um 3–4 mánuðum eftir fyrri námskeiðsdag og er þrjár klukkustundir. Dag- og tímasetning er ákveðin í samráði við þátttakendur á fyrri námskeiðsdegi.

Námskeið á vef

Fyrri hluti námskeiðsins

Þátttakendur fá aðgang að námsefni í Canvas og hafa eina viku til að horfa á fyrirlestra og vinna verkefni á þeim tíma sem þeim hentar.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00. Þar er farið yfir samræðufundina sem þátttakendur nýta síðan með nemendahópum í eigin starfi.

Milli námskeiðshluta

Þátttakendur vinna með tíu samræðufundi verkefnisins, hver í sínum skóla og með eigin nemendahópi.

Einstaklingsráðgjöf

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Seinni hluti námskeiðsins er byggður upp með sambærilegum hætti og sá fyrri. Þátttakendur fá aðgang að fyrirlestrum í Canvas og hafa eina viku til að fara yfir efnið.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00.

Umsagnir þátttakenda

„Verkefnin og verkfæri sem nýtast beint í starfi.“

„Skýr verkfæri til að vinna með samskipti barna, góðar útskýringar.“

„Góður grunnur að byggja á og útvíkka eða aðlaga að mismunandi bekkjarhópum.“

Nánari upplýsingar

Ragnhildur Íris Einarsdóttir
ragnhildur@unak.is