Samskipti stúlkna - leið til lausna

Á námskeiðinu Samskipti stúlkna – leið til lausna kynnast þátttakendur samræðu- og samskiptaverkefni fyrir stúlkur í 5.–10. bekk grunnskóla og læra að nýta það í eigin starfi. Verkefnið er ætlað bæði til fyrirbyggjandi vinnu og til að vinna með samskiptavanda sem þegar er til staðar.

Á námskeiðinu fá þátttakendur þekkingu á fræðilegum grunni verkefnisins og verkfæri til að leiða skipulagða samræðufundi með stúlknahópum. Verkefnið samanstendur af tíu samræðufundum sem hver um sig tekur 40–60 mínútur.

Markhópur:
Grunnskólakennarar á mið- og unglingastigi, náms- og starfsráðgjafar og félagsráðgjafar.

Markmið:

Að námskeiði loknu eiga þátttakendur að:

· þekkja fræðilegan grunn verkefnisins,

· geta undirbúið og leitt samræðufundi með stúlknahópum,

· geta nýtt verkfæri verkefnisins í fyrirbyggjandi starfi og við vinnu með samskiptavanda,

· hafa öðlast reynslu af því að nýta samræðufundina með nemendahópi í eigin starfi.

Um verkefnið með stúlknahópum

Markmið verkefnisins er að styðja við jákvæð samskipti og efla félagslega færni stúlkna. Í samræðufundunum gefst þeim tækifæri til að ræða samskipti sín, tengsl við aðra og félagsleg skilaboð sem beinast að ungum stúlkum.

Unnið er með æskileg og óæskileg samskiptamynstur og stúlkurnar fá tækifæri til að:

· efla færni sína í samskiptum við aðra,

· ræða mikilvægi félagstengsla, sjálfsvirðingar og félagslegrar samkenndar,

· hugsa á gagnrýninn hátt um samskipti sín og tengsl við aðra,

· ræða eigin reynslu af samskiptum,

· efla færni sína til að takast á við ágreining, félagslegan þrýsting og krefjandi samskipti við jafningja.

Uppbygging og framkvæmd

Námskeiðið er í boði á staðnum og á vef. Í báðum námskeiðsformum kynna þátttakendur sér efnið, prófa verkfæri verkefnisins með nemendahópi í eigin starfi og fá ráðgjöf í ferlinu.

Námskeið á staðnum

Fyrri hluti námskeiðsins

Þátttakendur og námskeiðshaldari hittast á staðnum. Farið er yfir hugmyndafræði og fræðilegan grunn verkefnisins og þátttakendur fá kynningu á efni og verkfærum verkefnisins.

Fyrri námskeiðsdagurinn er kl. 10.00–16.00.

Milli námskeiðshluta

Að loknum fyrri hluta vinna þátttakendur með tíu samræðufundi verkefnisins, hver í sínum skóla og með eigin nemendahópi.

Þátttakendur hafa aðgang að Padlet-svæði námskeiðsins þar sem hægt er að deila hugmyndum og reynslu af vinnunni.

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Í seinni hlutanum er unnið úr reynslu þátttakenda og námskeiðinu lokið.

Seinni hluti námskeiðsins fer fram um 3–4 mánuðum eftir fyrri námskeiðsdag og er þrjár klukkustundir. Dag- og tímasetning er ákveðin í samráði við þátttakendur á fyrri námskeiðsdegi.

Námskeið á vef

Fyrri hluti námskeiðsins

Þátttakendur fá aðgang að kennsluumhverfi námskeiðsins í Canvas og hafa eina viku til að horfa á fyrirlestra og vinna verkefni á þeim tíma sem þeim hentar.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00. Þar er farið yfir samræðufundina sem þátttakendur nýta síðan með nemendahópum í eigin starfi.

Milli námskeiðshluta

Þátttakendur vinna með tíu samræðufundi verkefnisins, hver í sínum skóla og með eigin nemendahópi.

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Seinni hluti námskeiðsins er byggður upp með sambærilegum hætti og sá fyrri. Þátttakendur fá aðgang að fyrirlestrum í Canvas og hafa eina viku til að fara yfir efnið.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00.

Umsagnir þátttakenda

„Gott að fá verkfæri í hendurnar.“

„Vekur okkur til umhugsunar um samskiptin. Frábær verkfæri.“

Nánari upplýsingar veitir:

Ragnhildur Íris Einarsdóttir ragnhildur@unak.is