Unglingaspjall

Á námskeiðinu Unglingaspjall kynnast þátttakendur samræðu- og samskiptaverkefni fyrir nemendur í 7.–10. bekk og læra að nýta það í eigin starfi. Verkefninu fylgja 15 handrit að samræðufundum og velja þátttakendur 10 þeirra til að vinna með sínum nemendahópi. Í verkefninu er meðal annars unnið með samræðu- og samskiptafærni, sjálfstyrkingu, tjáningu eigin skoðana og virðingu fyrir skoðunum annarra.

Markhópur

Grunnskólakennarar á miðstigi og unglingastigi, auk náms- og starfsráðgjafa.

Markmið námskeiðsins

Að námskeiði loknu eiga þátttakendur að:

þekkja fræðilegan grunn verkefnisins,
geta nýtt verkfæri verkefnisins til að vinna með þætti lykilhæfni í skólastarfi,
geta undirbúið og leitt samræðufundi með nemendahópum.

Um verkefnið með nemendum

Meginmarkmið Unglingaspjalls er að gefa nemendum tækifæri til að þjálfa samræðu- og samskiptafærni sem nýtist þeim í daglegum samskiptum.

Í verkefninu fá nemendur tækifæri til að:

vinna með samræðu- og samskiptafærni,
vinna með sjálfstyrkingu,
tjá eigin skoðanir,
æfa sig í að virða skoðanir annarra,
vinna með félagslega færni og samskipti,
ræða félagsleg skilaboð sem beinast að ungu fólki,
ræða mikilvægi félagstengsla, sjálfsvirðingar og félagslegrar samkenndar,
hugsa á gagnrýninn hátt um eigin samskipti og tengsl við aðra,
ræða eigin reynslu og skoðanir,
fjalla um samskipta- og álitamál.

Unglingaspjalli fylgja 15 handrit að samræðufundum. Þátttakendur velja 10 handrit sem henta viðkomandi nemendahópi og tekur hver samræðufundur 40–60 mínútur.

Uppbygging samræðufundanna

Hver samræðufundur felur í sér:

hópeflisleik,
viðfangsefni,
samræðu um viðfangsefnið,
verkefnavinnu,
millifundaverkefni,
samantekt.

Nemendur setja sér markmið á fundunum og vinna að þeim milli funda. Þeir vinna jafnframt millifundaverkefni sem tengjast samræðufundunum.

Grunnur að vinnunni er lagður strax á fyrsta fundi þegar hópurinn setur sér samræðuviðmið.

Unglingaspjall má nýta bæði með kynjaskiptum og blönduðum nemendahópum. Verkefnið má nota í fyrirbyggjandi starfi og þegar vinna þarf með krefjandi samskipti eða samskiptamynstur sem þegar hafa komið upp í hópnum.

Tenging við Aðalnámskrá

Unglingaspjall tengist lykilhæfni Aðalnámskrár grunnskóla og hæfniviðmiðum samfélagsgreina sem snúa að lífsleikni og siðfræði.

Uppbygging og framkvæmd

Námskeiðið er í boði á staðnum og á vef. Í báðum námskeiðsformum kynna þátttakendur sér efnið, velja handrit úr Unglingaspjalli til að prófa með nemendahópi í eigin starfi og fá ráðgjöf í ferlinu.

Námskeið á staðnum

Fyrri hluti námskeiðsins

Þátttakendur og námskeiðshaldari hittast á staðnum. Farið er yfir hugmyndafræði, fræðilegan grunn og efni verkefnisins.

Fyrri námskeiðsdagurinn er kl. 10.00–16.00.

Milli námskeiðshluta

Þátttakendur velja 10 handrit af þeim 15 sem fylgja Unglingaspjalli og vinna með samræðufundina í eigin skóla með nemendahópi.

Þátttakendur hafa aðgang að Padlet-svæði námskeiðsins þar sem hægt er að deila hugmyndum og reynslu af vinnunni.

Einstaklingsráðgjöf

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Í seinni hlutanum er unnið úr reynslu þátttakenda og námskeiðinu lokið.

Seinni hluti námskeiðsins fer fram um 3–4 mánuðum eftir fyrri námskeiðsdag og er þrjár klukkustundir. Dag- og tímasetning er ákveðin í samráði við þátttakendur á fyrri námskeiðsdegi.

Námskeið á vef

Fyrri hluti námskeiðsins

Þátttakendur fá aðgang að námsefni í Canvas og hafa eina viku til að horfa á fyrirlestra og vinna verkefni á þeim tíma sem þeim hentar.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00. Þar er farið yfir samræðufundina og hvernig þátttakendur nýta þá með nemendahópum.

Milli námskeiðshluta

Þátttakendur velja 10 handrit af þeim 15 sem fylgja Unglingaspjalli og vinna með samsvarandi samræðufundi með nemendahópi í eigin starfi.

Einstaklingsráðgjöf

Eftir 3–4 samræðufundi með nemendahópi fá þátttakendur einstaklingsráðgjöf frá námskeiðshaldara á Zoom.

Seinni hluti námskeiðsins

Seinni hluti námskeiðsins er byggður upp með sambærilegum hætti og sá fyrri. Þátttakendur fá aðgang að fyrirlestrum í Canvas og hafa eina viku til að fara yfir efnið.

Að vikunni lokinni hittast þátttakendur og námskeiðshaldari á Zoom-fundi í rauntíma kl. 14.00–16.00.

Umsagnir þátttakenda

„Að fá aðgengi að tilbúnu efni (pakka) til að nýta, ásamt góðri leiðbeiningu á námskeiðinu. Mjög hagnýtt.“

„Efnið er mjög aðgengilegt og stýrir vinnunni mjög vel.“

„Mér fannst námskeiðið hæfilega langt, vel framsett, skýrt og skipulagt.“

Nánari upplýsingar

Ragnhildur Íris Einarsdóttir
ragnhildur@unak.is